ពិធីនេះធ្វើឡើងក្រោមអធិបតីភាពឯកឧត្ដមសាស្រ្តាចារ្យ ធា គ្រុយ រដ្ឋលេខាធិការ ក្រសួងសុខាភិបាល ជាតំណាងដ៏ខ្ពង់ខ្ពស់ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល និងជាប្រធានក្រុមប្រឹក្សាភិបាល ស.វ.ស។

ឯកឧត្តមសាស្រ្តាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃស.វ.ស បានសម្តែងនូវគារវកិច្ច និង ស្វាគមន៍ជូនចំពោះគណៈអធិបតី និងអង្គពិធី។ ឯកឧត្តមសាកលវិទ្យាធិការបានលើកឡើងពីសមិទ្ធិផលសំខាន់ៗដែលស.វ.ស សម្រេចបាន តាមរយៈការកំណត់មាគ៌ាយុទ្ធសាស្រ្តរបស់ឯកឧត្តមសាស្រ្តាចារ្យ ម៉ម ប៊ុនហេង ប្រធានក្រុមប្រឹក្សាភិបាល ស.វ.ស សំដៅពង្រីកគុណភាពបណ្តុះបណ្តាល ស្រាវជ្រាវ នវានុវត្តន៍ និងផ្តល់សេវា ក្នុងការឈានទៅរកឧត្តមភាព និងគុណភាព ទាំងកម្រិតជាតិ តំបន់ និងអន្តរជាតិ។ ឯកឧត្តមបានថ្លែងអំណរគុណចំពោះដៃគូរអភិវឌ្ឍដែលតែងតែជួយគាំទ្រ និងចូលរួមយ៉ាងសកម្មជាមួយស.វ.ស។

អញ្ជើញមានមតិក្នុងឱកាសនោះ ឯកឧត្តមសាស្រ្តាចារ្យ ធា គ្រុយ រដ្ឋលេខាធិការក្រសួងសុខាភិបាល បានវាយតម្លៃខ្ពស់ ចំពោះភាពរីកចម្រើនឈានឡើងរបស់ស.វ.ស ពីមួយឆ្នាំ ទៅមួយឆ្នាំ។ ឯកឧត្តមសាស្រ្តាចារ្យ បានរំលេចពីសក្តានុពលស.វ.ស ដោយអនាគតនិស្សិតបានជ្រើសយកស.វ.សជាជំរើសទី១ មានចំនួនរហូតដល់ ៥,៣៩៦ នាក់ ក្នុងពេលដែលកូតាសម្រាប់ស.វ.ស មានត្រឹម ១,១៥៥ នាក់ប៉ុណ្ណោះ។ ឯកឧត្តមរដ្ឋលេខាធិការបានផ្តល់អនុសាសន៍ដល់និស្សិតឆ្នាំទី១ថ្មី សូមខិតខំប្រឹងប្រែងរៀនសូត្រឲ្យអស់ពីកំម្លាំងកាយ ចិត្ត និងគោរពឲ្យបានខ្ជាប់ខ្ជួននូវក្រមសីលធម៌វិជ្ជាជីវៈ ពេលចេញទៅប្រកបវិជ្ជាជីវៈនាពេលអនាគត។

គួរជម្រាបថា ឆ្នាំសិក្សាថ្មី ២០២២-២០២៣ នេះ ស.វ.សមាននិស្សិតសរុបចំនួន ៦,០០៣ នាក់ (ស្រី ៣,៤៤៧ នាក់)។ ចំនួននិស្សិតខាងលើនេះ មិនទាន់បានរាប់បញ្ចូលនិស្សិតឆ្នាំទី១ កម្រឹតបរិញ្ញាបត្ររង នៅឡើយ៕