ក្នុងវគ្គបណ្តុះបណ្តាលនេះមានការបង្ហាញអំពីទិដ្ឋភាពជារួមនៃគម្រោងស្រាវជ្រាវ និងផ្តល់ការបណ្តុះបណ្តាលស្តីពី វិធីសាស្រ្តប្រើប្រាស់ប្រព័ន្ធ Information and Communication Technology (ICT) របៀបប្រើប្រាស់ Tablet ក្នុងការបំពេញភារ:កិច្ច និងទំនាក់ទំនងជាមួយអ្នកជម្ងឺ រួមទាំងផ្តល់ការបណ្តុះបណ្តាលដើម្បីបង្កើនទំនុកចិត្ត និងការប្រាស្រ័យទាក់ទងគ្នាល្អជាមួយអ្នកជម្ងឺ។

ក្នុងឱកាសនេះផងដែរ ក៏មានការប្រគល់ Tablet ចំនួន ៦ គ្រឿងបន្ថែមជូនដល់មន្ទីរពេទ្យសេរីសោភ័ណ និងសេវាព្យាបាលជំងឺអេដស៍មន្ទីរពេទ្យព្រះកុសុមៈ ដែលគាំទ្រដោយអង្គការ AIDS Healthcare Foundation (AHF)។ គួរកត់សម្គាល់ដែរថា នេះជាលើកទី ២ ហើយដែល ស.វ.ស បានផ្តល់ជូន Tablet សម្រាប់សម្រួលដល់ទំនាក់ទំនងរវាងអ្នកជំងឺ និងអ្នកផ្តល់សេវាព្យាបាលជំងឺអេដស៍ក្រោមការឧបត្ថម្ភពីអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច។ ក្នុងឆ្នាំ ២០២១ ស.វ.ស បានប្រគល់ ចំនួន ១៤ គ្រឿងជូនដល់ គ្លីនិកជាតិព្យាបាលជំងឺអេដស៍ សើស្បែក និងកាមរោគ មន្ទីរពេទ្យជ័យជំនះ និងគ្លីនិកសុខភាពសង្គម ដើម្បីសម្រួលដល់ទំនាក់ទំនងជាមួយអ្នកជម្ងឺ និងស្ថាប័នពាក់ព័ន្ធផងដែរ។